“Bolalar uchun bitilgan mo‘jizalar” nomli davra suhbati tashkil etildi.

---

Joriy yilning 3-aprel sanasida Do‘stlik tumani Axborot-kutubxona markazi xodimlari hamda 2-umumta’lim maktabi bilan hamkorlikda bolalar yozuvchisi Hans Christian Andersen tavalludining 221 yilligi munosabati bilan “Bolalar uchun bitilgan mo‘jizalar” nomli davra suhbati tashkil etildi.

Mazkur davra suhbatining asosiy maqsadi o‘quvchilarda kitobxonlik madaniyatini shakllantirish, ularni jahon bolalar adabiyotining yorqin namoyandalaridan biri — Hans Christian Andersen hayoti va ijodi bilan yaqindan tanishtirishdan iborat bo‘ldi.

Tadbir davomida o‘quvchilarga yozuvchining hayoti, uning mashhur ertaklari hamda asarlarining mazmun-mohiyati haqida batafsil ma’lumotlar berildi. Xususan, Andersen ijodiga xos bo‘lgan mehr-oqibat, yaxshilik, halollik va sabr-toqat kabi insoniy fazilatlar misollar orqali tushuntirildi. O‘quvchilar yozuvchining ertaklari asosida fikr almashib, o‘z taassurotlarini bildirdilar.

Davra suhbati jarayonida bolajonlar ishtirokida qiziqarli savol-javoblar, interaktiv suhbatlar hamda kichik o‘yinlar tashkil etildi. Bu esa o‘quvchilarning faolligini oshirib, ularning mavzuga bo‘lgan qiziqishini yanada kuchaytirdi.